Մոսկվացի ձեռնարկատեր Մովսես Ձավարյանն իր հայրենի Ալավերդի քաղաքի դպրոցին 10 ժամանակակից համակարգիչ է նվիրել: Այդ մասին հայտնեց Ալավերդիի թիվ 5 դպրոցի տնօրեն Լաուրա Մելիքսեթյանը` ավելացնելով, որ գործարարը նույն դպրոցն ավարտել է 1978 թ-ին:
Մ. Ձավարյանը նաեւ «Հայ հանրությունը` Հայաստանի ուսանողներին» հիմնադրամի ակտիվ հովանավորներից է: Հիմնադրամի տնօրեն Արտավազդ Յախշիբեկյանի խոսքով` Ձավարյանն այդ կազմակերպության միջոցով արդեն մի քանի տարի վճարում է Հայ-ռուսական համալսարանի երկու ուսանող-ֆիզիկոսների ուսման վարձը:
Մ. Ձավարանը 1998-1999 թթ. զբաղեցրել է Հայաստանի առեւտրի եւ արդյունաբերության փոխնախարարի պաշտոնը, եղել է Առեւտրի համաշխարհային կազմակերպությանը Հայաստանի անդամակցության բանակցությունների նախաձեռնողներից: 2002-2003թթ. եղել է «Արմենալի» գլխավոր տնօրենը, հենց նրա օրոք էր, որ գործարանն արտադրանքի ծավալը հասցրեց ամսական 1500 տոննայի:
Մոսկվա տեղափոխվելով` նա հիմնադրել եւ ղեկավարում է «ԵվրոՏրաստ» խոշոր ընկերությունը, որը ծարգրեր է իրականացնում շինարարության, գյուղարտադրության համալիրների, հիդրոէներգետիկայի, ոչ հանքային օգտակար հանածոների յուրացման ոլորտներում:
